Kryetari i Prishtinës, Përparim Rama, ka njoftuar se gjatë ditëve të fundit kanë shkëputur tri kontrata me kompani të papërgjegjshme, të cilat, siç thotë ai, nuk kanë respektuar kushtet e kontratave të nënshkruara.
Rama thekson se kanë pasur ngecje të mëdha në realizim të punimeve, duke mbajtur projektet e papërfunduara dhe duke vështirësuar jetën e qytetarëve në lokacionet përkatëse.
Ai ka bërë të ditur se të njëjtave do t’u konfiskohet sigurimi i ekzekutimit të punimeve që arrin vlerën 10 për qind të shumës së projektit.
“Nuk do të tolererojmë papërgjegjësi dhe joseriozitet në projektet e Kryeqytetit. Kompanive që tilla do t’u konfiskojmë sigurimin e ekzekutimit të punimeve që arrin vlerën 10% të shumës së projektit. Do të vazhdojmë të sigurojmë cilësi e standard të ri të ndërtimit në rrugëtimin tonë të transformimit të Kryeqytetit”, thuhet në postimin e tij.