Kryetari i Prishtinës, Përparim Rama, ka reaguar pas miratimit të Deklaratës së Kuvendit të Republikës së Kosovës lidhur me aktgjykimin ndaj ish-krerëve të UÇK-së në Hagë.
Përmes një postimi në Facebook, Rama e ka cilësuar unitetin institucional në miratimin e deklaratës si të rëndësishëm, duke theksuar se çështjet që lidhen me luftën çlirimtare dhe historinë e Kosovës duhet të tejkalojnë dallimet politike.
“Ky unitet institucional në miratimin e Deklaratës së Kuvendit të Republikës së Kosovës për aktgjykimin ndaj ish-krerëve të UÇK-së në Hagë ishte jetik. Kur bëhet fjalë për luftën çlirimtare, për sakrificën e një populli dhe për të vërtetën historike të Kosovës, dallimet politike nuk duhet të jenë më të mëdha se përgjegjësia jonë e përbashkët”, ka shkruar Rama.
Ai ka theksuar se interesat shtetërore duhet të jenë mbi ato partiake.
“Mbi partitë është shteti. Mbi interesat ditore është e vërteta jonë historike”, ka deklaruar Rama.
Në reagimin e tij, Rama ka shtuar se drejtësia dhe e vërteta historike mbeten çështje me rëndësi për Kosovën.
“Sot Kuvendi e dha këtë mesazh. Dhe është një mesazh që duhet të dëgjohet fuqishëm edhe përtej Kosovës”, ka përfunduar ai.