Kryeministri i Shqipërisë, Edi Rama ka thënë se Shqipëria mbështetë thirrjen e presidentit të Shteteve të Bashkuara të Amerikës(ShBA), Joe Biden për një pauzë të luftimeve në Gaza dhe të mundësohet hyrja e ndihmës humanitare.
Rama ka shkruar në rrjetin social X, se Shqipëria qëndron e vendosur “me Izraelin kundër Hamasit”, por gjithashtu ajo mbetet shumë e “shqetësuar për vuajtjet e civilëve dhe shkatërrimin në Gaza”.
“Është thelbësore t’i jepet fund këtij konflikti përpara se ai të përshkallëzohet më tej dhe të dalë jashtë kontrollit”, ka shkruar ai.
“Shqipëria mbështet thirrjen e Presidentit Biden për një pauzë humanitare në armiqësitë. Në këmbim të një armëpushimi të menjëhershëm, Liga Arabe dhe Turqia duhet të sigurojnë lirimin e pakushtëzuar dhe të sigurt të të gjithë pengjeve të mbajtura nga Hamasi. Pas krimeve të tmerrshme të kryera më 7 tetor, nuk mund të ketë të ardhme politike për Hamasin”, ka shkruar ai.
Kryeministri shqiptar më tej ka shkruar se “sipas një mandati të OKB-së, një forcë ndërkombëtare e udhëhequr nga Liga Arabe mund të marrë përkohësisht kontrollin e Gazës, duke lehtësuar një kalim të përgjegjësive qeverisëse nga Hamasi te Autoriteti Palestinez”.
Në fund Rama ka paralajmruar se së shpejti do të diskutojnë me liderët botëror për kthimin e paqes në Lindjen e Mesme.
“Së shpejti do të bashkohem me liderët e tjerë botërorë në Forumin e Paqes në Paris, ku do të diskutojmë mënyrat për rivendosjen e paqes në Lindjen e Mesme”, ka shkruar Rama.
While we firmly stand with Israel against Hamas, we are also very concerned about the suffering of civilians and the destruction in Gaza. It is crucial to end this conflict before it escalates further and spirals out of control. Albania supports President Biden's call for a…
— Edi Rama (@ediramaal) November 6, 2023