Sot në Asamblenë e Jashtëzakonshme të ICMG u miratua prezantimi i propozimit dhe vazhdimi i përgatitjeve për Lojërat Mesdhetare Prishtina 2030.
Kryetari i Prishtinës, Përparim Rama, vlerëson se ky është hap i madh për kryeqytetin dhe për gjithë Kosovën, njofton Dukagjini.
“Ky është një hap i madh për Kryeqytetin dhe për gjithë Kosovën. Prishtina po ecën me siguri drejt 2030-ës me vizion të qartë, plan konkret dhe energjinë e një gjenerate që beson se mund të bëjë histori. Lojërat Mesdhetare nuk janë vetëm sport: janë zhvillim urban, infrastrukturë moderne, mundësi për të rinjtë dhe një dritare e hapur për ta prezantuar Prishtinën në botë”, ka shkruar Rama.
Rama, mes tjerash, ka falënderuar të gjithë partnerët e këtij rrugëtimi duke premtuar se puna e madhe sapo ka nisur dhe të do të bëjnë gjithçka bashkë.
“Falënderim i veçantë për Komitetin Olimpik të Kosovës, Administratën e Kryeqytetit dhe Qeverinë e Kosovës për përkushtimin dhe partneritetin në këtë rrugëtim.Po ashtu, faleminderit Qeverisë së Shqipërisë dhe Komitetit Olimpik të Shqipërisë që na kanë mundësuar qasjen në det, një bashkëpunim që e pasuron këtë projekt dhe e bën më të fortë dimensionin mesdhetar të Lojërave. Së bashku gjithmonë mund të bëjmë më shumë dhe më mirë. Puna e madhe sapo ka nisur dhe ne do ta bëjmë bashkë”, ka shkruar Rama.