Kryetari i Prishtinës, Përparim Rama, ka përkujtuar 25 vjetorin e ditës memoriale të të mbijetuarave të dhunës seksuale.
“Sot, me zemra të mbushura me nderim, përkujtojmë atë çka gratë trime të Kosovës kaluan nëpër gjatë luftës së ashpër që shkundi themelet e vendit tonë. Me atë guxim të madh dhe qëndresë, ato menduan se ishin të vetmuara në errësirën e vuajtjeve të paimagjinueshme, por sot ne dëshmojmë se nuk janë dhe asnjëherë nuk do të jenë të harruara,” shkruan Rama.
Sipas tij memoriali “Heroinat” do të qëndrojë si një flamur lirie që ngre lartë lavdinë e grave.
“Memoriali “Heroinat” do të qëndrojë jo thjesht si gur i ngritur në kujtim, por si një flamur lirie që ngre lart lavdinë e atyre grave, simbol i forcës dhe qëndrueshmërisë së tyre të palëkundur. Ky është vendi ku shpirti i tyre trim dhe i pathyeshëm do të frymëzojë brez pas brezi.”
E Rama thotë se me lavdi do të kujtohen përherë betejat e heshtura.
“Sot, me zemrat tona të mbushura me përkushtim, ne rikonfirmojmë zotimin tonë për të mos harruar kurrë sakrificat e tyre. Ne do të kujtojmë me lavdi çdo betejë të heshtur që ato luftuan, çdo lot që ranë në heshtje, dhe çdo buzëqeshje që rifituan nëpër dhimbje. Ato janë yjet që na udhëheqin nëpër terrin e harresës, dritat që luftojnë kundër errësirës së injorancës.
Ne u përkulemi atyre, sot dhe përherë,” ka shkruar Rama.