Kryetari i Prishtinës, Përparim Rama, ka njoftuar se shërbimi i Trafikut Urban do të rikthehet normalisht nga nesër, pasi komuna ka realizuar pagesën ndaj ndërmarrjes sapo janë alokuar mjetet nga Ministria.
Rama tha se komuna ka reaguar menjëherë në momentin kur buxheti i paraparë është bërë i qasshëm dhe theksoi se qytetarët do të kenë sërish në dispozicion transportin publik pa pengesa.
“Sot, sapo u alokuan mjetet nga Ministria, ne si komunë menjëherë realizuam pagesën ndaj Trafikut Urban.
Nga nesër rikthehet shërbimi për qytetarët, të cilëve u kërkojmë ndjesë për shqetësimet dhe i falënderojmë për mirëkuptimin.
Punëtorëve të Trafikut Urban u shprehim mirënjohje të veçantë për korrektësinë dhe për punën e palodhshme që e bëjnë çdo ditë për kryeqytetin tonë.
Ju uroj punë të mbarë dhe shëndet!”, ka shkruar Rama në Facebook.