Kryetari i Prishtinës, Përparim Rama, u ka bërë thirrje qytetarëve që t’i bashkohen protestës së kryetarëve të komunave, e cila do të mbahet më 1 shtator në sheshin “Skënderbeu”, në Prishtinë.
Protesta është paralajmëruar në orën 11:00 dhe, sipas Ramës, do të mbahet kundër asaj që ai e konsideron bllokim të komunave dhe ndëshkim të qytetarëve.
“Boll mo! Qytetarët nuk mund të ndëshkohen sepse nuk e kanë votuar Vetëvendosjen”, ka shkruar Rama.
Ai ka akuzuar Qeverinë në detyrë të udhëhequr nga Albin Kurti se po bllokon mjetet financiare dhe investimet komunale, duke e lidhur këtë me rezultatet e zgjedhjeve.
Sipas Ramës, fondet publike duhet të përdoren për investime në shkolla, çerdhe, rrugë, shëndetësi dhe projekte të tjera që u shërbejnë qytetarëve.