Raportimi nga e premtja në komunat në veri të vendit ishte një tjetër sfidë për gazetarët në Kosovës. Në mesin e provokimeve, të sharave, pengimit të raportimit, të shtënave dhe jo vetëm, gazetarët e Kosovës, raportuan nga veriu për zhvillimet e fundit atje.
E pikërisht gazetarët janë tema që “Radar” zhvilloi sot. Së bashku me Edita Dolin në Radio Dukagjini ishte Xhemajl Rexha nga radhët e Asociacionit të Gazetarëve të Kosovës i cili tregoi disa nga sfidat me të cilat u ballafaqua atje.
“Ajo çka ndodhi dje nuk ka ndodhur për një kohë të gjatë…shumë dhuna brenda një kohe shumë të shkurtër… Preukopimi ynë kryesor është siguria e gazetarëve e cila nuk merret parasysh nga NATO-ja, KFOR-i që nuk ofron siguri përkundër ftesave tona për të bashkëpunuar dhe as nga Policia e Kosovës e cila ndoshta kapacitetet i ka më të koordinuara por që është në koordinim të vazhdueshëm me NATO-në”, ka thënë ai.
Ai thekson se ajo çka vuri re në veri ishin gazetarë të rinj dhe një solidaritet në mes mediave, pavarësisht garës për raportime.
Pjesë e “Radar”-it të sotëm qenë edhe gazetarët e RTV Dukagjini që raportuan nga komunat në veri të vendit, Liridon Llozani dhe Sylejman Sylejmani.
Gjersa tregon se dita për të nisi herët për të qenë në ambientet e Dukagjinit në 05:00 të mëngjesit, Llozani tha se gazetarët atje nuk qenë aspak të sigurt.
“Ka disa post-blloqe të Policisë së Kosovës por megjithatë gjatë gjithë këtij segmenti nuk je i sigurtë, të paktën nuk ndjehemi dhe e di që s’jemi të sigurt”, ka treguar ai.
Jo më ndryshe mendon edhe Sylejmani. Ai thekson se me ardhjen e personave të maskuar në veri situata eskaloi.Këto ditë në veri, ai i konsideron si ngjarjet më të rënda të raportimit të tij ndër vite.
Për të parë të plotë intervistën, kliko këtu.