Policia e Kosovës në koordinim me Prokurorinë Themelore në Ferizaj, të enjten, në kuadër të hetimeve lidhur me rastin “Brezovica”, ka bastisur një numër të madh të autosalloneve, shtëpive dhe lokaleve përcjellëse në lokacione të ndryshme, konkretisht në qytetin e Prishtinës, Ferizajt, Vushtrrisë, Lipjanit dhe Vitisë, ndërkaq ka arrestuar 15 persona të dyshuar.
Policia e Kosovës në raportin 24-orësh ka dhënë detaje nga bastisjet dhe sekuestrimet që janë bërë.
“Njësitet policore të DHKR-së, në bashkëpunim e koordinim me Gjykatën e Prokurorinë Themelore në Ferizaj, njësitet e ATK-së dhe njësitet e Doganës së Kosovës, kanë kryer kontrolle-bastisje në 21 shtëpi banimi dhe 11 objekte biznesi në lokacione të ndryshme si: Prishtinë, Ferizaj, Gjilan dhe Vushtrri”, thuhet në raportin 24-orësh.
Siç thuhet në njoftim, gjatë bastisjes, fillimisht janë arrestuar 14 të dyshuar meshkuj kosovarë dhe më pas është arrestuar edhe një i dyshuar tjetër.
Ndërsa, policia ka njoftuar se si dëshmi janë sekuestruar 8 armë të ndryshme me 76 fishekë kalibër i ndryshëm, 2 shufra metalike, DVR, 22 vetura, 2 motoçikleta, 83 mijë e 995 euro, 16 USB dhe dokumente të ndryshme.
Ndërkaq, me vendim të prokurorit të gjithë të dyshuarit janë dërguar në mbajtje.