Kryetari i Partisë Socialdemokratike, Dardan Molliqaj, ka reaguar pas dakordimit ndërmjet kryeministrit të Kosovës, Albin Kurtit dhe presidentit të Serbisë, Aleksandar Vuçiqit, për zbatimin e planit evropian.
Sipas përfaqësuesit të lartë të Bashkimit Evropian për Politik të Jashtme, Josep Borrell, Kosova është dakorduar që menjëherë të zbatohet nenin 7 i propozimit evropian.
Molliqaj këtë e ka quajtur tradhti ndaj Kosovës, duke thënë se “një parti që u ngrit nga mijëra protesta kundër Asociacionit, sot e solli atë”.
Më tutje, Molliqaj ka paralajmëruar protesta kundër kësaj marrëveshjeje.
Më poshtë mund të lexoni postimin e plotë të kryetarit të Partisë Socialdemokratike, Dardan Molliqaj.
Sot u tradhtua Kosova!
Një njeri i ngjitur në pushtet nga rezistenca më e fuqishme e pas luftës në vend, sot e dorëzoi Kosovën.
Një parti që u ngrit nga mijëra protesta kundër Asociacionit, sot e solli atë.
Një qeveri që mashtroi për 2 vite se nuk do të negociojë pa njohjen në qendër, sot e pranoi përjetësimin e mosnjohjes.
Sot, Albin Kurti i ndau rrugët nga ata qindra mijëra njerëz që e kundërshtuan Asociacionin. I ndau rrugët me ata që edhe sot vazhdojnë të jenë kundër, po aq fuqishëm.
Sot, Albin Kurti Kosovës po ia rrezikon të ardhmen, sepse vetes po don t’ia ruajë pushtetin.
Sot, Albin Kurti e tradhtoi Kosovën.
Por, sot, më shumë se kurrë, u qartësua rruga e rezistencës. Rezistencës që do të rritet, përditë e më shumë.
Shihemi në protesta!