Drejt dy euro është duke shkuar rritja e çmimit të derivateve.
Të hënën ka vazhduar rritja dhe është shënuar një tjetër rekord.
1 euro e 89 centë benzinën e 1 euro e 87 naftën për litër e kanë paguar qytetarët e Kosovës.
I papërballueshëm po duket të jetë ky çmim për atë që vozisin automjete.
Me ngulm po kërkojnë dorën e shtetit që kjo gjendje të përmirësohet.
“Qeveria tash duhet të bëjë diqka, ato akciza t’i largojë, dhe stabilizohet si shtetet tjera, unë po e shoh çmimet po fluturojnë. Në Shqipëri është 2.20 edhe këtu është shumë, qeveria t’i largojë taksat akzicat edhe të stabilizojë se është shumë lartë, çmimi i çmendur”, ka thënë Reshat Salihu –qytetar.
“Unë kam qenë dje për punë private në Shkup, për 17 cent ma lirë në Shkup se këtu edhe është më cilësore nafta”, ka thënë një Nuha Rama, një tjetër qytetar.
“Qeveria duhet me marrë masa me zbut gjendjen sepse mundësitë bugjetore të qytetarëve tonë nuk janë aq të mira, kshtu që me zbritje të akcizës për importimin e masës është një lloj mase që mundet me ndihmu qeveria që naftëtarët mos me i ngritë çmimet”, ka thënë Vesel Veseli –qytetar.
Shtete të ndryshme evropiane kanë ndërhyrë në çmime, sikurse është Gjermania, e cila ka hequr një pjesë të taksave për karburante.
Shqetësimeve të qytetarëve nuk u është përgjigjur Qeveria e Kosovës. RTV Dukagjini ka pyetur Ministrinë e Ekonomisë për mundësinë e ndërhyrjes në uljen e çmimeve të derivateve përmes heqjes së akcizës ose ndonjë opsion tjetër, por ata nuk janë përgjigjur.
Megjithatë, kërkesës së kamotshme të opozitës për heqje të akcizës, i është përgjigjur ministri Hekuran Murati, përmes një postimi në Facebook.
“Thirrjet e opozitës që Qeveria të ulë TVSH-në apo akcizën në naftë ose produkte tjera, nuk i shërbejnë interesit të qytetarëve. Përkundrazi, një veprim i tillë vetëm sa do të trashte fitimet e tregtarëve në njërën anë, dhe do të kufizonte mundësitë e shtetit që t’i mbështesë familjet në nevojë në anën tjetër. Ulja e TVSH-së apo akcizës në situata inflacionare, jo domosdo reflektohet në zbritje të çmimit tek konsumatori”.
Nga ana tjetër, e shkurtër ka qenë përgjigja mbi këtë rritje të çmimit të derivateve nga Shoqata e Naftëtarëve të Kosovës .
“Çmimet ndryshojnë nga pika në pikë karburanti, tregu është i lirë dhe liberal. Qytetarët kanë mundësi që të zgjedhin ku të furnizohen”, ka thënë Fadil Berjani nga Shoqata e Naftëtarëve.
Çmimi i derivateve në Kosovë, muajt e fundit ka arritur në shkallën më të lartë ndonjëherë dhe në këtë ka ndikuar situata politike e tensionuar në mes të Ukrainës dhe Rusisë.