Bisedimet për avancimin e planit të presidentit amerikan Donald Trump për përfundimin e luftës në Gaza janë pezulluar që nga java e kaluar, pasi SHBA dhe Izraeli kryen sulme të përbashkëta ndaj Iranit, duke nxitur një përshkallëzim të konfliktit në Lindjen e Mesme.
Lajmi është raportuar nga Reuters, duke cituar tre burime të përfshira drejtpërdrejt në negociata. Sipas këtyre burimeve, ndërprerja e bisedimeve rrezikon të ngadalësojë zbatimin e iniciativës kryesore të Trumpit për paqen në Lindjen e Mesme, të cilën ai e ka paraqitur si një objektiv madhor të politikës së jashtme.
Kjo situatë vjen vetëm pak javë pasi Trump kishte siguruar miliarda dollarë zotime financiare nga shtetet arabe të Gjirit për rindërtimin e Gazës.
Plani i Trumpit parashikon që militantët e Hamasit të dorëzojnë armët në këmbim të amnistisë, një hap që synon të hapë rrugën për rindërtimin e territorit dhe për tërheqje të mëtejshme të forcave izraelite. Sipas Reuters, ndërmjetësuesit e Shtëpisë së Bardhë kanë zhvilluar bisedime jozyrtare mes Izraelit dhe Hamasit për çështjen e çarmatimit. Burimet bëjnë të ditur se negociatat u ndërprenë më 28 shkurt, në ditën kur nisi lufta me Iranin.
Megjithatë, një zyrtar i Shtëpisë së Bardhë ka mohuar se bisedimet janë pezulluar plotësisht, duke deklaruar se diskutimet për çarmatimin e Hamasit “vazhdojnë dhe janë pozitive”.
Nga ana tjetër, një zyrtar i Hamasit konfirmoi për Reuters se bisedimet për planin e Trumpit janë ngrirë për momentin, ndërsa një zyrtar izraelit theksoi se çarmatimi i Hamasit mbetet një kusht i panegociueshëm për Izraelin.
Ndërkohë, përshkallëzimi i konfliktit ka ngritur shqetësime edhe për sigurinë e një baze ushtarake të udhëhequr nga SHBA në jug të Izraelit, ku koordinohet pjesa më e madhe e politikës ndërkombëtare për Gazën.
Diplomatët e huaj kanë bërë të ditur se operacionet në këtë qendër janë reduktuar në minimum për shkak të frikës nga sulmet raketore iraniane. Analistët vlerësojnë se përparimi i planit për Gazën varet nga angazhimi i vazhdueshëm i administratës amerikane. Sipas Natan Sachs nga Middle East Institute në Washington, vetëm vëmendja e vazhdueshme e SHBA-së mund ta mbajë planin në rrugën e duhur.
“Pa këtë angazhim, objektivat e ndryshme të palëve në konflikt mund të çojnë lehtësisht në rezultate shumë të ndryshme dhe madje në rifillim të luftimeve”, ka deklaruar Sachs për Reuters përcjell Dukagjini.