Deputeti i Lëvizjes Vetëvendosje, Arbër Rexhaj, ka deklaruar se brenda grupit parlamentar të LVV-së ka deputetë me qëndrime të ndryshme sa i përket bashkëpunimit me partitë e tjera.
Duke folur në Debat Plus, Rexhaj tha se në mesin e 53 deputetëve të LVV-së ka të tillë që kanë vullnet për bashkëpunim me Partinë Demokratike të Kosovës dhe të tjerë që e shohin të mundshëm bashkëpunimin me Lidhjen Demokratike të Kosovës.
Ai u shpreh se kryetari i PDK-së, Bedri Hamza, nëse do ta kishte seriozisht idenë për bashkëpunim me LVV-në, nuk do ta kishte ndërprerë këtë mundësi pas vetëm një takimi.
“Në VV i kemi 53 deputetë, një grup Parlamentar që i ka 53 deputetë, aty ki deputetë që ka vullnet të bëjë koalicion me PDK-në, ka vullnet me LDK-në. Ke deputetë të mendimeve të ndryshme. Te ne janë 53 deputetë, ki tylifarë mendimi. Bedri Hamza ta kish pas idenë e bashkëpunim me VV-në, nuk e kish shkëput këtë punë me një takim… brenda PDK-së ka shumë element problematik që nuk e lejojnë bashkëpunimin me LVV”, ka deklaruar Rexhaj.