Deputeti nga radhët e Lëvizjes Vetëvendosje (LVV), Arber Rexhaj, ka deklaruar se është Kosova, ajo e cila ka bërë hapa drejt deeskalimit të situatës.
Në “Debat Plus” të RTV Dukagjini, ai ka deklaruar se është pala serbe, ajo e cila po e shkel. Krahas kësaj, ai përmend edhe një deklaratë të dhënë nga kryeministrja serbe Brnabiq.
“Nëse keni vërejtur është një marrëveshje atje në mes kryeministrit dhe fasilituesit të dialogut për reduktimin e forcave brenda objekteve komunale, të cilët më pas e kryejnë punën në veri. Kosova ka bërë hapa drejt deeskalimit, mirëpo nëse e keni pa kryeministren e Serbisë, duke pasur parasysh edhe marrëveshjen e Ohrit, është Serbia që nuk po e respekton. Kur flet ajo thotë se nuk po flasim për dy shtete, por për një shtet, duke aluduar që Kosova është pjesë e Serbisë”, ka deklaruar ai.
Krahas kësaj, ai ka theksuar se Kosova nuk ka negociuar me palën serbe për çështjet e brendshme të saj.
Lidhur me situatën në veri dhe mundësinë e dorëheqjes së kryetarve të komunave atje, Rexhaj ka theksuar se nëse dorëheqjet do të ishin zgjidhja, ato do të jepeshin në kohë.
Kryeministri i Kosovës, Albin Kurti, në Forumin Strategjik të Bledit në Slloveni, gjatë fjalës së tij ka pasur një polemikë me kryeministren e Serbisë, Ana Brnabiq, pasi ajo e quajti Kosovën pjesë të Serbisë.
“Së pari duhet të them se është vendi im, nuk janë dy vende. E ashtuquajtura Republika e Kosovës nuk është vend ndërkombëtarisht i njohur, nuk është pjesë e OKB-së. Dyshoj se do të bëhet pjesë e BE-së, së paku jo derisa të ketë njohje nga vendet e BE-së”, ka thënë Brnabiq në pyetjen e bërë nga udhëheqësi i panelit në Forum tha se “të dyja vendet dëshirojnë të jenë pjesë e BE-së”.
Pas kësaj deklarate, Kurti ka thënë se Kosova ka vënë sanksione ndaj Rusisë, ndërsa Serbia as nuk po i mendon dhe nuk janë distancuar nga Millosheviqi as nga Putini.
Dekalarata e Kurtit u duartrokit nga të pranishmit.