Teksa pritej të shpallej aktgjykimi për të akuzuarën për vrasje të rëndë, trupi gjykues në Gjykatën Themelore në Prishtinë ka vendosur ta rihapë rastin për shkak të dorëzimit të disa provave të reja nga pala mbrojtëse e të akuzuarës.
F.S,akuzohet se derisa ishte në dhomën e fjetjes së tani të ndjerës T.S, në gjendje të përgjegjësisë esencialisht të zvogëluar, nga motive të panjohura e kishte privuar nga jeta motrën e saj.
Sipas gjykatësit Kushtrim Shyti, deri tek rihapja e shqyrtimit gjyqësorë ka ardhur pasi që trupi gjykues ka vlerësuar se duhet të administrohen provat, përkatësisht dokumentet mjekësore të paraqitura nga ana e mbrojtësit të të akuzuarës, avokat Halit Shaljani për shëndetin e të njëjtës, shkruan BetimipërDrejtësi.
Ndryshe, më nëntë maj të vitit 2021, Prokuroria Themelore në prishtinë, kishte ngritur aktakuzë ndaj F.S.
Sipas aktit akuzues, derisa tani e ndjera ishte e shtirë në krevatin e dhomës së saj e pandehura fillimisht e kishte shtrënguar në qafë dhe fyt e më pa e kishte lidhur edhe shaminë në fyt, me ç’rast nga ngufatja kishte ndërruar jetë, ndërsa e pandehura kishte ikur nga vendi i ngjarjes duke kërcyer nga dritarja.
Lidhur me këtë, F.S po akuzohet për veprën penale “Vrasje e rëndë” nga neni 173, par 1, pika 1.3 të Kodit Penal.