Në kuadër të Procesit të Berlinit, ministrja e Ekonomisë në Qeverinë e Kosovës, Artane Rizvanolli, ka prezantuar planet dhe nevojat e Kosovës në sektorin e energjisë.
Po ashtu, Rizvanolli para të pranishmëve, i ka njoftuar ata për masat që i ka marrë Qeveria e Kosovës në përballjen me krizën energjetike.
“Në takimin e ministrave të Energjisë në kuadër të Procesit të Berlinit, me ftesë të ministrit Gjerman për Çështje Ekonomike dhe Veprim Klimatik, Robert Habeck, kam prezantuar progresin, planet dhe nevojat e Republikës së Kosovës në sektorin e energjisë, si dhe masat për përballjen me krizën energjetike evropiane”, ka shkruar Rizvanolli.
Ministrja Rizvanolli në këtë takim ka bërë të ditur se ka theksuar nevojën për përshpejtimin e mbështetjes nga Bashkimi Evropian dhe nga Gjermania për efiçiencë të energjisë në sektorin e banimit, ngrohje qendrore, si dhe kapacitete të reja gjeneruese të burimeve të ripërtërishme të energjisë.