Ministrja e Ekonomisë, Artane Rizvanolli, ka thënë se Kosova është në rrugë të mirë sa i përket krijimit të kushteve për tërheqjen e investimeve të huaja.
Në një konferencë për media, ministrja Rizvanolli për deklaratat e kryeministrit të Kosovës, Albin Kurti, se më 31 korrik mund të kishte një përshkallëzim të situatës në Veri dhe se Kosova rrezikon luftë pasi presidenti rus Vladimir Putin qëndron prapa Serbisë, ka thënë se përkundër këtyre, Kosova në sytë e investitorëve nuk është më një shtet që ka fokus korrupsionin dhe mungesën e sundimit të ligjit, por siç thotë ajo, recepcioni i Kosovës si një shtet i korrupsionit është zbehur.
“Investitorët dhe opinioni publik kudo në Evropë e ka shumë të qartë se si po zhvillohen gjërat dhe e shohin tentimin e Rusisë për të destabilizuar vendet në Ballkan si dhe tentimin që ta destabilizojë rajonin përmes Serbisë”.
Ajo ka thënë se në takimet me investitorë në përgjithësi feedback-u ka qenë pozitiv.
“Recepcioni i Kosovës si shtet ku nuk sundon ligji është zbehur. Është çrrënjosur korrupsioni në nivel të lartë. Shumë prej atyre gjërave që janë përfolur për korrupsion në nivel të lartë janë konfirmuar në takimet e ndryshme me zyrtarë të lartë ku kemi pasur vizita, prandaj jemi në rrugë shumë të mirë në këtë aspekt”, ka përfunduar Rizvanolli.