Ministrja e Ekonomisë, Artane Rizvanolli, u ka bërë thirrje komunave të Kosovës, që ta kursejnë energjinë elektrike edhe në festat e fundvitit.
Rizvanolli, tha se planifikon të marrë masa sa i përket ndriçimit dekorativ për festat e fundvitit duke e kufizuar kohëzgjatjen dhe masën që këto përdoren.
“Nuk ka ndonjë vendim të kohëve të fundit për mos ndriçim të shesheve apo për festat e fundvitit. Masat që i kemi marrë para një muaji, është i ndaluar ndriçimi dekorativ, ndërsa sa i përket ndriçimit dekorativ për festat e fundvitit, planifikojmë të marrim masa duke e kufizuar kohëzgjatjen dhe masën që këto përdoren”, ka thënë Rizvanolli.
“Është e rëndësishme që komunat të mundohen që kohëzgjatja e dekorimit dhe mënyra dhe pajisjet të jenë të tilla që shpenzojnë më pak dhe ta kenë parasysh konsumin e energjisë dhe koston që e ka me vete”, ka vijuar ajo.