Rohde: Kosova dhe Serbia duhet të marrin vendime të vështira, dialogu të përfundojë me njohje
Ambasadori i Gjermanisë në Kosovë, Jorn Rohde, i ka paralajmëruar Kosovën dhe Serbinë se duhet të bëhen gati për vendime të vështira, pasi Qeveria e Gjermanisë dialogun në mes të këtyre dy vendeve e ka vendosur në prioritetet e saj dhe nuk ka kohë që të shtyhen problemet e pazgjidhura. Më tej, ai e […]





Ambasadori i Gjermanisë në Kosovë, Jorn Rohde, i ka paralajmëruar Kosovën dhe Serbinë se duhet të bëhen gati për vendime të vështira, pasi Qeveria e Gjermanisë dialogun në mes të këtyre dy vendeve e ka vendosur në prioritetet e saj dhe nuk ka kohë që të shtyhen problemet e pazgjidhura.
Më tej, ai e ka përmendur edhe pajtimin në mes të Francës dhe Gjermanisë pas Luftës së Dytë Botërore, model që sipas tij duhet ta ndjekin Kosova dhe Serbia.
“Së pari dua të theksoj se Qeveria gjermane ka vendosur dhe e ka cilësuar si prioritet përmirësimin e gjendjes dhe situatës në Ballkanin perëndimor si dhe dialogun midis Kosovës dhe Serbisë”.
“Ju sigurisht e keni parë deklaratën tonë ku kemi theksuar se vizita e Jens Plötner dhe Bonnet, në shoqëri të Lajçakut ka pasur për qëllim që t’ua bëjë të qartë të gjitha palëve se duhet të merren vendime të vështira politike, sepse më nuk ka kohë për shtyrjen e problemeve të pazgjidhura”.
“Jemi duke jetuar në një kohë të jashtëzakonshme, kur kemi një luftë që po zhvillohet në Evropë dhe pikërisht nga kjo arsye, tani duam që situata të përmirësohet këtu dhe pikërisht kjo është arsyeja përse Sarrazin ishte javën e kaluar këtu, pra për të shtyrë përpara këtë proces”, ka thënë ai në një intervistë për “Radio Kosovën” të enjten.
Sipas Rohde, fundi i bisedimeve në mes të Kosovës dhe Serbisë, duhet t’u japë fund edhe problemeve dhe njohja reciproke duhet të jetë rezultati përfundimtar i dialogut.
“Gjatë vizitës së kancelarit gjerman Scholz në Kosovë, ai theksoi ato që Qeveria gjermane i ka nënvizuar gjithnjë, se të dyja vendet synojnë anëtarësimin në Bashkimin Evropian, ndërsa është e paimagjinueshme që Bashkimi Evropian të pranojë dy vende që nuk e njohin njëri-tjetrin”.
“Pra, është plotësisht e qartë se njohja reciproke duhet të jetë rezultati përfundimtar i procesit të dialogut dhe kjo është e qartë për ne. Tani si do të vijë deri te ky përfundim? Unë mund të them se ka shumë rrugë që na shpien në krye”, ka deklaruar ai.




















