Ambasadori gjerman në Kosovë, Jorn Rohde, ka komentuar takimin e kryeministrit Albin Kurti dhe të dërguarin gjerman për Ballkanin Perëndimor, Manuel Sarrazin.
Diskutimet e këtij takimi, Rohde i quan të mira dhe intensive për rrugën përpara në Procesin e Berlinit.
“I nderuar që kam përsëri si të ftuar në rezidencën time, kryeministrin Albin Kurtin, dhe të dërguarit tim për Ballkanin Perëndimor, Manuel Sarrazin. Diskutim i mirë dhe intensiv për rrugën përpara në Procesin e Berlinit”, shkroi ai.
Në këtë takim, shefi i ekzekutivit me Sarrazinin kanë diskutuar për zbatimin e marrëveshjeve të mobilitetit në Procesin e Berlinit, ndër to edhe për lëvizjen me letërnjoftime në mes të Kosovës dhe Bosnjë e Hercegovinës.
Temë diskutimi ishte bashkëpunimi rajonal dhe pritjet nga Samiti i radhës që do të mbahet në Berlin në 10-vjetorin e tij.
“Progresi në zbatimin e marrëveshjeve të mobilitetit në Procesin e Berlinit, bashkëpunimi rajonal dhe pritjet nga samiti i radhës që në 10-vjetorin e tij do të mbahet në Berlin, ishin temë e diskutimit. Kryeministri kujtoi rëndësinë që para samitit të radhës të fillojë zbatimi i marrëveshjes për udhëtim me letërnjoftime ndërmjet Kosovës dhe Bosnjë dhe Hercegovinës, që lehtëson lëvizjen e lirë të qytetarëve. Kryeministri theksoi se më 16 maj në Kotor të Malit të Zi, Kosova kërkoi që Ballkani Perëndimor të bëhet pjesë e Autoritetit Kundër Pastrimit të Parave (AMLA) të Bashkimit Evropian për të rritur integritetin financiar dhe për të forcuar bashkëpunimin në luftën kundër krimit financiar, kërkesë kjo që u bë pjesë e deklaratës së përbashkët të lëshuar në Kotor”, thuhet në njoftimin e Zyrës së Kryeministrit.
Kurti ka falënderuar emisarin gjerman edhe për rolin e tij në forcimin e raporteve në mes të Kosovës dhe Gjermanisë, si dhe në avancimin e bashkëpunimit rajonal.
Kurti takon Sarrazinin, kërkon të zbatohet marrëveshja për lëvizje me letërnjoftime me Bosnjën