Ambasadori i Gjermanisë në Kosovë, Jorn Rohde, ka reaguar pas arrestimit të drejtorit të Administratës së Leposaviqit, Nikolla Radomiroviq.
Me anë të një postimi në Twitter, Rohde ka shprehur shqetësimin e tij, duke thënë se kjo ngre dyshime për ngacmime politike.
Sipas ambasadorit gjerman, pritet që të shqyrtohet ankesa zyrtare.
“Duke ndjekur nga afër raportet shqetësuese për ndalimin e shefit të administratës së Leposaviqit në Serbi. Nuk është hera e parë në muajt e fundit që ndalimi në pikën kufitare ngre dyshime për ngacmime politike. Pritet që ankesa zyrtare të shqyrtohet shpejt”, ka shkruar ai.
Closely following concerning reports about the detention of the head of the Leposavic administration in Serbia. Not the first time in recent months that detention at border crossing raises suspicions of political harassment. Expect that the official appeal is considered swiftly.
— Ambassador Jörn Rohde (@GermanAmbKOS) September 13, 2023
Ndryshe, ministri për Komunitete dhe Kthim në Qeverinë e Kosovës, Nenad Rashiq, i bëri thirrje të dielën, siç e quajti ai, regjimit radikal të Serbisë, ta lirojë drejtorin e ri të komunës së Leposaviqit, Nikolla Radimiroviq, për të cilin tha se u arrestua më 9 shtator dhe po mbahet në Rashkë, jugperëndim të Serbisë.
Ministri i Mbrojtjes i Kosovës, Xhelal Sveçla, tha të shtunën vonë se politikani serb i Kosovës, Radimiroviq, u arrestua së bashku me të fejuarën e vet.
Nikolla është i biri i zëvendësministrit për Komunitete dhe Kthim në Qeverinë e Kosovës, Radoica Radimiroviq.
Rashiqi tha më 10 shtator në një konferencë për media në Prishtinë se “arsyeja për arrestimin e Nikollës është presioni ndaj Radoicas.”
“Guxoj të them se kjo është pjesë e metodologjisë së shantazheve”, theksoi Rashiq.
Radimiroviq u emërua drejtor i Administratës së komunës së Leposaviqit pas zgjedhjeve të prillit në katër komunat me shumicë serbe në veri, nga të cilat dolën kryetarët shqiptarë dhe të cilat u bojkotuan dhe u kundërshtuan nga serbët – duke çuar në tensionimin e gjendjes.