Ambasadori i Gjermanisë në Kosovë, Jorn Rohde, ka theksuar nevojën, të cilën ai e quan urgjente, për vazhdimin e dialogut dhe zbatimin e marrëveshjes së Ohrit në mes të Kosovës dhe Serbisë.
Kjo pas sulmit kriminal dhe terrorist të së dielës kundër Policisë së Kosovës në veri.
“Sulmi i tmerrshëm kriminal dhe terrorist i së dielës kundër oficerëve të zbatimit të ligjit në Kosovë nënvizon nevojën urgjente për të vazhduar bisedimet e dialogut dhe zbatimin e marrëveshjes së Ohrit tani”, shkroi ai.
Sunday’s heinous criminal and terrrorist attack against Kosovo law enforcement officers underlines the urgent need to continue Dialogue talks and the implementation of the Ohrid agreement now https://t.co/Qk0TBXuUn3
— Ambassador Jörn Rohde (@GermanAmbKOS) September 26, 2023
Këtë deklaratë, Rohde e bëri derisa ka shpërndarë një postim në Twitter të emisarit të BE-së, Miroslav Lajçak, i cili është takuar me këshilltarët e lartë të krerëve të Francës, Gjermanisë e Italisë, me pjesëmarrjen e të dërguarit të posaçëm të Shteteve të Bashkuara të Amerikës, Gabriel Escobar.
Afrim Bunjaku, rreshter i Policisë së Kosovës, u vra në fshatin Banjskë të komunës së Zveçanit, më 24 shtator 2023.
Sipas Policisë së Kosovës, në orët e hershme të 24 shtatorit, dy kamionë pa targa ishin vendosur në urën në hyrje të fshatit Banjskë, duke e bllokuar lëvizjen.
Njësitë policore, ku ishte edhe Afrim Bunjaku, u qëlluan me armë zjarri, pasi arritën në vendin e ngjarjes.
Bunjaku nuk u mbijetoi plagëve të marra.
Incidenti ku u vra ai shënoi fillimin e një përleshjeje të armatosur në mes të Policisë së Kosovës dhe një grupi të armatosur në Zveçan.