Deputeti i zgjedhur i Partisë Demokratike të Kosovës (PDK), Eman Rrahmani, ka deklaruar se vendi ka nevojë për një ndryshim të qeverisjes, duke vlerësuar se vazhdimi i udhëheqjes nga Lëvizja Vetëvendosje nuk është në interes të Kosovës.
Në Five në TV Dukagjini, Rrahmani tha se gjashtë vitet e fundit të qeverisjes, sipas tij, nuk kanë sjellë rezultate konkrete për qytetarët në fushat kyçe të zhvillimit të vendit.
“Mirëpo e kamë thënë dhe them edhe tash, është shumë e rëndësishme për vendin. Që të mos kemi vazhdimësi të kësaj qeverisje, cfare kemi pasur tash e 6 vite. Është dëshmuar që nuk i ka sjellë asnjë dobi vendit, asnjë zhvillim ekonomik, as në përmirësimin e arsimit, as të shëndetësisë e as një fushë tjetër që është në interes të qytetarëve. Si i tillë duhet të kishim angazhim të përbashkët, që të mosvazhdimit të një qeverisje të tillë, e cila e vendosin vendin dhe secilin qytetarë…”, ka thënë Rrahmani.
Sipas Rrahmanit, partitë politike duhet të angazhohen së bashku për të parandaluar vazhdimin e kësaj qeverisjeje, të cilën e konsideron të dëmshme për vendin.
Ai shkoi edhe më tej, duke e cilësuar si “obligim patriotik” angazhimin e çdo politikani për të mos lejuar LVV-në në krye të ekzekutivit.
“Është obligim patriotik, i secilit që angazhohet në politik që të mos e lejojë një qeverisje të tillë, çfare ka qenë deri sot në vendin tonë… mendoj se nuk duhet të jetë LVV ajo që udhëheq qeverinë e Kosovës, qoftë Albin Kurti, qoftë kushdo prej pjesëtarëve të LVV. Për shkak në atë grupim politik është një mendësi e qeverisjes dhe nuk ka rëndësi a vjen Albini apo një person tjetër”, ka shtuar Rrahmani.
Deputeti i zgjedhur i PDK-së ka theksuar gjithashtu se kundërshtimi i tij ndaj një qeverie të udhëhequr nga Vetëvendosje mbetet i pandryshuar edhe në rast të formimit të një koalicioni të mundshëm mes PDK-së dhe LVV-së.