Trotinetët E-scooters, po përdoren në masë të madhe sidomos në kryeqytet. Dhe për këtë, kanë filluar procedurat për përgatitjen e një rregulloreje, sipas kushteve të përcaktuara në Ligjin për automjete në Republikën e Kosovës.
Nënkryetari i Komunës së Prishtinës, Alban Zogaj, përmes një postimi në rrjetin social Facebook, ka njoftuar që së shpejti rregullorja për E-scooters do të dalë në diskutim publik dhe ka treguar për disa nga rregullat.
“Rregullorja për E-Scooters do të dalë në diskutim publik së shpejti”, ka thënë Zogaj.
Disa nga rregullat janë këto:
“Me dy ose më shumë rrota të drejtuara me timon mekanik, sisteme të frenimit, sinjalistikë, bori dhe që vihen në lëvizje nga një motor elektrik i nënshtrohen rregullave të trafikut dhe kushteve të përcaktuara, sipas Ligjit për automjete të Republikës së Kosovës.
- Fuqi maksimale 500W
- Shpejtësia maksimale 25km/h
- Mosha 15+
- Ndalohet ngasja në pjesë të gjelbëruara”, ka shkruar ai.
Skuterët elektrikë të cilët janë në dispozicion për vite me radhë, mund të shkojnë nga 15mph deri në 25km/h, ndërsa krahasuar me biçikletat, skuterët elektrikë janë më të lehtë që të përdoren nëpër rrugët e qytetit.