Të paktën tetë persona kanë vdekur dhe rreth 20 të tjerë rezultojnë të zhdukur, pasi një traget u përmbys të dielën në det, pranë qytetit portual Kyrenia, në veri të Qipros.
Trageti me dy trupa kishte 267 persona në bord dhe pësoi defekt pak pasi u nis nga Kyrenia drejt portit turk Taşucu, në provincën e Mersinit. Anija mori ujë dhe më pas u përmbys, ndërsa disa prej pasagjerëve mbetën të kapur pas pjesës së përmbysur të tragetit.
Pasagjerët e mbijetuar u shpëtuan nga anije që ndodheshin pranë vendit të ngjarjes dhe nga pjesëtarë të rojës bregdetare.
Ekipet e kërkim-shpëtimit kanë vazhduar kërkimet gjatë natës dhe të hënën, ndërsa në operacion janë përfshirë edhe zhytës nga Turqia.
Autoritetet kanë dhënë shifra të ndryshme për personat e zhdukur, duke përmendur 18 dhe 19 persona. Nuk dihet ende nëse ka persona të bllokuar brenda tragetit, i cili tashmë ndodhet në fund të detit, në një thellësi prej më shumë se 500 metrash.
Dëshmitarët kanë treguar se trageti pësoi një lëkundje të fortë para se të godiste sipërfaqen e detit. Sipas dëshmive, pjesa e përparme e anijes u dëmtua dhe u hap pas goditjes.
Ndërkohë, autoritetet kanë ndaluar kapitenin dhe anëtarët e ekuipazhit të tragetit për t’i marrë në pyetje lidhur me incidentin.
Trageti kryente një nga linjat e përditshme detare që lidhin veriun e Qipros, të kontrolluar nga turqit, me Turqinë, raporton The Guardian.