Shefi i mercenarëve të Wagner, Yevgeny Prigozhin, supozohet se ka vdekur pasi u shfaq në listën e pasagjerëve të një avioni privat që u rrëzua në veri të kryeqytetit rus, Moskë.
Prigozhin ishte një aleat kyç i presidentit rus, Vladimir Putin dhe kompania e tij private ushtarake ka luajtur një rol kyç në Ukrainë pas pushtimit të Moskës në shkurt të vitit 2022.
Por, marrëdhënia e tij me Putinin u përkeqësua pasi Prigozhin urdhëroi trupat e tij të marshonin drejt Moskës në një rebelim të dështuar kundër liderëve ushtarakë të Rusisë në qershor.
Detajet e përplasjes ende po dalin, por ja çfarë dihet deri më tani.
Çfarë ndodhi me aeroplanin?
Zyrtarët e aviacionit rus konfirmuan se avioni, një Embraer Legacy, po fluturonte midis Moskës dhe Shën Petersburgut kur u rrëzua në rajonin Tver, në veri të Moskës të mërkurën në mbrëmje.
Por, kanali Telegram, i lidhur me Wagner-in, Gray Zone, raportoi se avioni ishte rrëzuar nga ushtria ruse – megjithëse nuk dha prova për të mbështetur pretendimin e saj.
Siç ka raportuar BBC, avioni privat mbante shtatë pasagjerë dhe tre anëtarë të ekuipazhit.
Sipas informacioneve paraprake, 10 persona në bord janë vrarë. Agjencia e lajmeve Interfax ka thënë se të gjithë trupat janë gjetur. Prigozhin ishte në listën e shtatë pasagjerëve të avionit privat, ndërsa tre personat e tjerë në bord ishin anëtarë të ekuipazhit.
Një tjetër agjenci lajmesh, Tass, ka thënë se Embraer Legacy – e regjistruar në një nga kompanitë e Prigozhin – mori flakë duke u përplasur në tokë, duke qenë në ajër për më pak se gjysmë ore.
Videoja e verifikuar nga BBC tregonte një avion duke rënë nga qielli në Kuzhenkino të Rusisë.
Gray Zone ka raportuar se një avion i dytë biznesi në pronësi të Prigozhin u ul i sigurt në rajonin e Moskës.
Çfarë dihet për Prigozhin?
Sipas autoriteteve ruse, bosi i Wagner ishte në listën e pasagjerëve të aeroplanit të rrëzuar.
Agjencia e aviacionit më pas publikoi atë që thuhet se ishte një listë e konfirmuar e personave në bordin e avionit. Gray Zone ka raportuar se ai ka vdekur.
Prigozhin ka mbajtur një profil relativisht të ulët që nga rebelimi i tij jetëshkurtër kundër komandantëve të lartë ushtarakë të Rusisë, të cilët ai i kishte kritikuar vazhdimisht për strategjinë e tyre në Ukrainë.
Putin më vonë e akuzoi atë për tradhti.
Sipas një marrëveshjeje për t’i dhënë fund rebelimit, akuzat kundër tij u hoqën dhe atij iu ofrua një lëvizje në Bjellorusi. Që atëherë vendndodhja e tij ka qenë objekt spekulimesh intensive.
Javën e kaluar Prigozhin publikoi deklaratën e tij të parë video që nga rebelimi i dështuar i qershorit, i cili sugjeroi se ai ishte në Afrikë.
BBC nuk ka qenë në gjendje të verifikojë se ku është filmuar videoja.
Çfarë tjetër kanë thënë autoritetet?
Sipas komitetit hetimor të Rusisë, një hetim penal ka nisur për shkakun e rrëzimit sipas nenit 263 të kodit penal të Rusisë, i cili rregullon sigurinë e trafikut dhe funksionimin e transportit ajror.
Ndërkohë, shërbimet e urgjencës kanë përfunduar kërkimet në vendngjarje. Guvernatori i rajonit Tver, Igor Rudenya, thuhet se ka marrë kontrollin e hetimeve.