Shteti rus ka mirëpritur udhëtimin e planifikuar të Agjencisë Ndërkombëtare të Energjisë Atomike (IAEA) në termocentralin bërthamor Zaporizhzhia në Ukrainën juglindore.
Media shtetërore ruse “RIA Novosti” ka njoftuar se përfaqësuesi i përhershëm i Rusisë pranë organizatave ndërkombëtare në Vjenë, Mikhail Ulyanov, ka thënë se Rusia e kupton që IAEA do të lërë disa përfaqësues në termocentral në baza të përhershme.
“Me sa kuptojmë, është qëllimi i drejtorit të përgjithshëm që të lërë disa njerëz në stacion në mënyrë të përhershme”, tha Ulyanov.
Mikhail Ulyanov ka shtuar se misioni përbëhet nga “rreth një duzinë punonjësish të sekretariatit të agjencisë që merren me çështjet e mbrojtjes dhe sigurisë bërthamore”, si dhe një ekip i madh i stafit të OKB-së që merret me logjistikën dhe sigurinë, raportoi RIA.
“Rusia ka dhënë një kontribut të rëndësishëm në përgatitjen e këtij misioni. Shpresojmë që vizita e uzinës nga misioni i IAEA-s do të largojë spekulimet e shumta për gjendjen e pafavorshme të punëve në termocentralin bërthamor Zaporizhzhia,” ka thënë Ulyanov.
Vendet e G7 kanë mirëpritur gjithashtu udhëtimin e ardhshëm, duke thënë se stafi i IAEA duhet të jetë në gjendje të hyjë në të gjitha objektet bërthamore në Ukrainë në kohë, në mënyrë të sigurt dhe pa pengesë.
Në deklaratën e shtetve të G7, tutje, thuhet se ekipi i IAEA duhet të angazhohet drejtpërdrejt dhe pa ndërhyrje me personelin ukrainas përgjegjës për operimin.
Ekipi i OKB-së niset për në centralin bërthamor në Zaporizhzhia