Të paktën nëntë persona kanë vdekur në një valë të re sulmesh në të gjithë Ukrainën, në të cilat Rusia përdori armë të fuqishme, duke përfshirë raketa të rralla hipersonike.
Rusia thuhet se nuk kishte gjuajtur raketa hipersonike Kinzhal – të cilat mund të shmangin mbrojtjen ajrore – që nga muajt e parë të konfliktit.
Breshëria e fundit ishte më e rënda që goditi Ukrainën për javë të tëra, e cila ndërpreu energjinë e centralit bërthamor të Zaporizhzhia – më i madhi në Evropë.
Zëdhënësi i Ministrisë ruse të Mbrojtjes, Igor Konashenkov, ka thënë të enjten se “Armët me rreze të gjatë veprimi me precizion të lartë ajrore, detare dhe tokësore, duke përfshirë sistemin raketor hipersonik Kinzhal, goditën elementët kryesorë të infrastrukturës ushtarake të Ukrainës”.
Ishte dita më e madhe e sulmeve ruse në Ukrainë që nga fundi i janarit.
Ushtria ukrainase ka pretenduar se kishte rrëzuar me sukses 34 raketa lundrimi dhe katër drone Shahed të prodhuar nga Irani.
Por ajo gjithashtu u shpreh se nuk kishte mundur të kapte gjashtë raketat balistike Kinzhal – as nuk ishte në gjendje të shkatërronte armë të vjetra, të tilla si raketat kundër anijeve Kh-22 dhe raketat antiajrore S-300.
“Ky ishte një sulm i madh dhe për herë të parë me kaq shumë lloje të ndryshme raketash,” citoi agjencia e lajmeve Reuters të thoshte një zëdhënës i forcave ajrore ukrainase. “Ishte si kurrë më parë”, raporton BBC.