Rusia ka nisur të premten votimin për zgjedhjen e Dhomës së Ulët të Parlamentit, duke hapur procesin zgjedhor që do të zgjasë tri ditë dhe në të cilin partia e presidentit Vladimir Putin, “Rusia e Bashkuar”, pritet të ruajë dominimin.

Këto janë zgjedhjet e para parlamentare që mbahen në Rusi që nga dërgimi i trupave ruse në Ukrainë në shkurt të vitit 2022.

Më shumë se 110 milionë qytetarë rusë kanë të drejtë vote për 450 deputetë të Dumës së Shtetit. Aktualisht, “Rusia e Bashkuar” kontrollon më shumë se dy të tretat e ulëseve në parlament dhe pritet ta vazhdojë kontrollin e saj.

Në zgjedhje janë regjistruar vetëm parti që mbështesin presidentin Putin dhe luftën e Rusisë në Ukrainë, ndërsa opozita është përjashtuar nga pjesëmarrja.

Partia opozitare “Yabloko” u përjashtua nga lista e partive pjesëmarrëse muajin e kaluar.

Zgjedhjet po zhvillohen në një kohë kur në Rusi raportohet për ndryshime në qëndrimin publik ndaj luftës, të lidhura me rritjen e çmimeve, kufizimet në internet, mungesat e karburantit dhe zërat për një mobilizim të ri pas zgjedhjeve.

Pavarësisht pritshmërive për fitoren e “Rusisë së Bashkuar”, procesi zgjedhor po shihet gjerësisht si një lloj matjeje e mbështetjes për vazhdimin e fushatës ushtarake ruse në Ukrainë.

Putin e ka përshkruar votimin si një “kontribut kolektiv për fitoren e Rusisë kundër Ukrainës”.

Votimi nisi fillimisht në Gadishullin Kamçatka dhe Çukotka, ndërsa procesi zhvillohet në 11 zonat kohore të Rusisë. Qendrat e votimit do të qëndrojnë të hapura deri të dielën në orën 18:00 GMT.

Për herë të parë, zgjedhjet po mbahen edhe në territoret ukrainase të pushtuara nga Rusia – Luhansk, Donetsk, Zaporizhzhia dhe Kherson – kundër vullnetit të autoriteteve në Kiev.

Ndërkohë, Krimea, e aneksuar nga Rusia në vitin 2014, po merr pjesë për herë të dytë në zgjedhjet parlamentare ruse.

Përveç zgjedhjeve për Dumën e Shtetit, qytetarët do të votojnë edhe për parlamentet rajonale në tetë rajone të Rusisë.