Moska do të vazhdojë bashkëpunimin dhe tregtinë me Iranin, pavarësisht kërcënimeve për sulme dhe tarifa nga Shtetet e Bashkuara, ka deklaruar ministri i Jashtëm rus, Sergei Lavrov.
I pyetur për presionin amerikan ndaj Iranit, Lavrov tha se Rusia do të zbatojë marrëveshjet dypalëshe dhe shtoi se asnjë fuqi e jashtme nuk mund ta ndryshojë natyrën e marrëdhënieve mes dy vendeve, shkruan Aljazeera, transmeton Dukagjini.
Duke folur në një konferencë për shtyp në Moskë, Lavrov u shpreh se veprimet e SHBA-së po kontribuojnë në fragmentimin e rendit global dhe po dëmtojnë besueshmërinë e Uashingtonit.
“Kolegët tanë amerikanë duken të pabesueshëm kur veprojnë në këtë mënyrë,” tha Lavrov.
Ai shtoi se, duke braktisur parimet që i ka promovuar prej kohësh, SHBA-ja po e dobëson kornizën ndërkombëtare të ndërtuar gjatë dekadave.
“Këto dhe veprime të tjera në arenën ndërkombëtare tregojnë vijën e kolegëve tanë amerikanë për të shkatërruar të gjithë sistemin që është krijuar për shumë vite me pjesëmarrjen e tyre,” tha Lavrov.