Sekretari i përgjithshëm i NATO-s, Mark Rutte, ka reaguar ndaj qasjes së presidentit rus Vladimir Putin në negociatat për paqe mes Rusisë dhe Ukrainës që po zhvillohen në Turqi, me ndërmjetësimin e Sekretarit Amerikan të Shtetit, Rubio.
Gjatë një deklarate për mediat ndërkombëtare nga Tirana, Rutte tha se dërgimi i një delegacioni të nivelit të ulët nga ana e Moskës është një sinjal i qartë i mungesës së seriozitetit nga ana e Putinit në raport me arritjen e një marrëveshjeje për armëpushim.
“Çdo pjesë e territorit ukrainas duhet të jetë aty. Putin bëri gabim që dërgoi një delegacion të nivelit të ulët. Topi është në fushën e tij. Ai duhet të luajë, për vendosjen e paqes. E njoh shumë mirë Putinin, e di që ai nuk është i prirur për paqe.
Është shumë mirë që ukrainasit kanë ardhur në tryezë dhe kanë dërguar një delegacion mjaft të prirur për të negociuar paqen. Jam shumë i lumtur për rolin që po luan SHBA, për rolin që ka marrë Trump për të zhbllokuar gjithë këtë situatë”, ka thënë Rutte.