Të dhënat e fundit të Eurostat tregojnë dallime të mëdha në kohëzgjatjen e javës së punës në Evropë. Në Bashkimin Evropian punohet mesatarisht 35.9 orë në javë, ndërsa Zvicra është pikërisht në të njëjtin nivel. Në disa vende të Ballkanit, megjithatë, java mesatare e punës kalon 40 orë.
Sipas të dhënave për orët reale të punës, të cilat përfshijnë të punësuarit me orar të plotë dhe të pjesshëm të moshës 20 deri në 64 vjeç, dallimet mes vendeve evropiane janë të konsiderueshme, përcjell albinfo.ch.
Në Zvicër, mesatarja arrin në 35.9 orë pune në javë, po aq sa mesatarja e Bashkimit Evropian.
Ballkani me javët më të gjata të punës
Nëse krahasimit i shtohen edhe vendet kandidate për anëtarësim në BE dhe shtetet e EFTA-s, Turqia regjistron javën më të gjatë të punës, me mesatarisht 42.4 orë.
Pas saj renditen Bosnjë e Hercegovina me 40.9 orë dhe Serbia me 40.6 orë.
Këto janë të vetmet tri vende të përfshira në krahasim ku mesatarja kalon 40 orë në javë.
Në mesin e vendeve me orare të gjata janë edhe Greqia me 39.6 orë, Maqedonia e Veriut me 39.5 orë dhe Bullgaria me 38.7 orë, përcjell albinfo.ch.
Kështu, vendet e Ballkanit dominojnë pjesën e sipërme të renditjes për javën më të gjatë të punës në Evropë.
Ekspertët vlerësojnë se dallimet nuk lidhen vetëm me zgjedhjen individuale të punonjësve. David Spencer, profesor në University of Leeds, thotë se numri i orëve të punës ndikohet fuqishëm nga punëdhënësit, produktiviteti dhe fuqia negociuese e punonjësve.