Nënkryetari i Komunës së Skenderajt, Sami Lushtaku, është ndaluar në zyrat e EULEX-it për intervistim nga hetuesit e Zyrës së Prokurorit të Specializuar (ZPS).
Këtë e ka konfirmuar për Dukagjinin djali i tij, Mergim Lushtaku, njëherësh deputet i PDK-së.
“Janë duke biseduar me avokatin, pasi sipas të gjitha gjasave është vetëm për telefon. Sipas avokatit vetëm për telefon dhe ende është në zyret e EULEX-it”, ka thënë Lushtaku, duke shtuar se me babain e tij ndodhet edhe avokati në zyrat e EULEX-it në Fushë-Kosovë.
Mergim Lushtaku është jashtë objektit të EULEX-it së bashku me familjarë të tjerë.
Gjithashtu, aty është edhe kryetari i Komunës së Skenderajt, Fadil Nura, me një pjesë të kabinetit.
Ndërkaq, Dukagjini ka tentuar të marrë detaje nga Zyra e Prokurorit të Specializuar, por ende s’ka pranuar një përgjigje.
Kujtojmë se para një dite cak i bastisjeve nga Specialja ishte njëri prej eprorëve të lartë të Ushtrisë Çlirimtare të Kosovës (UÇK), Sylejman Selimi.