Qeveria e Kosovës ka dërguar një letër komandantit të KFOR-it, Enrico Barduani, për të sqaruar angazhimin e Forcës së Sigurisë së Kosovës (FSK) në veri, duke theksuar se ky angazhim nuk kishte për qëllim të tensiononte situatën në atë rajon.
Ministri i Mbrojtjes, Ejup Maqedonci, ka shpjeguar se letra që iu dërgua komandantit të KFOR-it nuk është një rizotim i angazhimeve të vitit 2013, siç ishte raportuar.
“Letra zotuese e vitit 2013 është dërguar nga ish-kryeministri Thaçi për Sekretarin e Përgjithshëm të NATO-s. Pra çështjet përmbajtësore të zotimit adresohen në atë nivel, kurse në nivelin tim dhe të Komandantit të KFOR-it është që të sigurojmë njëri tjetrin që do të bëjmë veprimet e nevojshme për të garantuar që angazhimi ynë ushtarak në veri të bëhet në mënyrë të koordinuar”, ka deklaruar Maqedonci.
Ai ka sqaruar se letra ka për qëllim të sigurojë koordinimin e nevojshëm mes institucioneve të Kosovës dhe KFOR-it, duke theksuar se angazhimi i FSK-së në veri është bërë gjithmonë pas koordinimit paraprak me KFOR-in, siç e parashikon zotimi i vitit 2013 i bërë nga ish-kryeministri Hashim Thaçi.
“Qëllimi i letrës ka qenë që të sqaroj Komandantin e KFOR që një angazhim i një njësie të FSK në një ndër katër komunat në veri të Kosovës që ka ndodhur pak ditë para dërgimit të letrës nuk ka pas qëllim tensionimin e situatës”, ka theksuar ai për Dukagjinin.
Maqedonci ka theksuar se letra ka sqaruar se angazhimi i një njësie të FSK-së në veri nuk ka pasur qëllim të krijonte tensione, dhe se institucionet e Kosovës do të vazhdojnë të respektojnë zotimin e bërë në vitin 2013 për koordinim të çdo operacioni të FSK-së në veri me KFOR-in.
“Në letër kam sqaruar rrethanat e angazhimit të njësisë së FSK-së dhe si gjithnjë që e kam thënë publikisht në media, kam ritheksuar që insitucionet e Kosovës do të vazhdojnë të respektojnë zotimin e bërë më 19 prill 2013 për angazhimin e FSK në operacione në veri pas koordinimit paraprak me Komandantin e KFOR”, ka deklaruar tutje Maqedonci.
Ai ka shtuar gjithashtu se, megjithëse ky zotim ka qenë i gabuar dhe i dëmshëm për ushtrinë e Kosovës, institucioni i tij do të vazhdojë ta respektojë atë.