Vetëm një takim në Kosovë do ta ketë kancelari i Gjermanisë, Olaf Scholz, dhe ai takim do të jetë me kryeministrin Albin Kurti.
Përveç me të dhe vizitës që do t’u bëjë trupave gjermane që shërbejnë në kuadër të KFOR-it, takime të tjera në Prishtinë, deri të enjten, nuk janë parashikuar.
Kështu kanë deklaruar për RTK, në përgjigje me shkrim, Zyra për Media e Qeverisë së Gjermanisë.
Kjo zyrë konfirmon se kancelari gjerman do të mbërrijë në Prishtinë të premten, më 10 qershor në orën 9:45 minuta.
Ai do të pritet në takim nga kryeministri Albin Kurti, kurse më pas, në orën 11:30, është përcaktuar të mbahet edhe një konferencë e përbashkët për media.
Me kaq, takimet e kancelarit gjerman në Kosovë do të mbarojnë.
“Mbërritja në Serbi është parashikuar në orën 15:00. Atje kancelari do të pritet nga presidenti Vuçiq ku do të ketë diskutime me të dhe kryeministren Bërnabiq”, thotë për RTK, një zëdhënës për media në Qeverinë e Gjermanisë.
Bazuar në këtë agjendë, është parashikuar që në orën 16:50 të ketë një konferencë të përbashkët për media të kancelarit Scholz e presidentit Vuçiq.
Kancelari Olaf Scholz, pas Kosovës dhe Serbisë, do të vizitojë edhe Greqinë, Maqedoninë e Veriut dhe Bullgarinë, ku edhe i jep fundit kësaj vizite në vendet e Ballkanit perëndimor.
Të gjitha këto vizita dhe takime do të realizohen më datën 10 dhe 11 qershor.
Ndërkaq, analisti Visar Ymeri në emisionin “Five” të RTV Dukagjinit, për vizitën e kancelarit gjerman, Olaf Scholz, që pritet të jetë të premten në Kosovë, kishte thënë se është vizitë e mirëseardhur dhe e rëndësishme, sepse sipas tij, Gjermania po mbështet Kosovën në shumë pika kyçe.
“Kemi një rikthim të vëmendjes së Gjermanisë për zhvillimet në Ballkan, përkrahja në dialogun Kosovë-Serbi, përkrahja e Gjermanisë për anëtarësim në KiE, po ashtu edhe për liberalizim të vizave”, kishte thënë Ymeri.