Sekretari amerikan i Energjisë, Chris Wright, ka deklaruar se çmimet e naftës do të mbeten të larta dhe mund të rriten edhe më tej derisa të rikthehet qarkullimi normal i anijeve në Ngushticën e Hormuzit.
Duke folur në një forum ekonomik në Washington DC, ai tha se tregjet pritet të arrijnë kulmin e çmimeve të naftës në javët e ardhshme, para se të nisë një rënie graduale.
“Derisa të përfundojë konflikti dhe të rifillojë rrjedhja e energjisë, presim presion në rënie të çmimeve, por kjo do të marrë kohë,” tha Wright.
Ai shtoi se sa më gjatë të zgjasë konflikti, aq më e vonuar do të jetë edhe stabilizimi i tregut të naftës.
Bllokada amerikane ndaj porteve të Iranit ka hyrë në fuqi, pasi presidenti Donald Trump njoftoi se ajo nis në orën 10:00 sipas kohës së SHBA-së (14:00 GMT / 15:00 BST).
Duke folur në Shtëpinë e Bardhë, Trump tha se Irani “dëshiron shumë një marrëveshje” dhe se ai është kontaktuar mëngjesin e sotëm nga “personat përkatës” për arritjen e një dakordësie.
Në një postim në rrjetet sociale, ai paralajmëroi se çdo anije iraniane e tipit “fast attack” që i afrohet zonës së bllokadës do të “eliminohet menjëherë”.
Më herët, kryetari i parlamentit iranian deklaroi se vendi nuk do të “dorëzohet nën kërcënime”, ndërsa deri tani nuk ka pasur reagim zyrtar ndaj deklaratave të fundit të Trump.