Mbi 13 mijë litra të produktit dizel janë sekuestruar këtë të premte nga Inspektorati Qendror i Mbikëqyrjes së Tregut (IQMT), i cili funksionon në kuadër të Ministrisë së Industrisë, Ndërmarrësisë dhe Tregtisë (MINT).
Sipas njoftimit kjo sasi e dizel-it është hasur në treg të brendshëm pa i plotësuar vlerat e caktuara të cilësisë.
“Inspektorati Qendror i Mbikëqyrjes së Tregut (IQMT), në kuadër të Ministrisë së Industrisë, Ndërmarrësisë dhe Tregtisë, gjatë kontrolleve në tregun e brendshëm të Republikës së Kosovës, ka sekuestruar 13,661.00 Litër (trembëdhjetë mijë e gjashtëqind e gjashtëdhjetë e një litër) dizel, të cilat janë hasur në treg të brendshëm pa i plotësuar vlerat e caktuara të cilësisë”, thuhet në njoftim.
“Në bazë të raporteve të testimit të mostrave të marra ka rezultuar që produkti Dizel është në kundërshtim me vlerat e caktuara të U.A. 01/2017 për cilësinë e karburanteve të lëngëta të naftës”, vijon njoftimi.
MINT ka theksuar se nuk do lejohen në tregun e brendshëm të qarkullojnë produkte që nuk i plotësojnë kërkesat ligjore.
“Ministria e Industrisë, Ndërmarrësisë dhe Tregtisë respektivisht IQMT garanton konsumatorët dhe bizneset e përgjegjshme se nuk do të lejohen në tregun e brendshëm të Republikës së Kosovës, të qarkullojnë produkte që nuk i plotësojnë kërkesat ligjore, e gjithë kjo në interes të mbrojtjes së konsumatorit, vendosjes së produkteve cilësore në treg si dhe mbrojtjes së konkurrencës së drejtë në treg”, thuhet në njoftim.
