Senati miratoi të shtunën kandidaturën e Kristi Noem për postin e sekretares së Sigurisë Kombëtare duke e vënë ish-guvernatoren e Dakotës së Jugut, në krye të një agjencie që është thelbësore për sigurinë kombëtare dhe planet e presidentit amerikan Donald Trump për ta ndalur migracionin e paligjshëm.
Noem u miratua me 59 vota pro dhe 34 kundër.
Të premten Senati miratoi kandidaturën e Pete Hegseth për postin e sekretarit të Mbrojtjes me një votim të ngushtë 51 me 50. Hegseth u betua të shtunën.
Noem dhe Hegseth i bashkohen sekretarit të Shtetit, Marco Rubio dhe drejtorit të CIA-s, John Ratcliffe, të konfirmuar tashmë në detyrë.
Të hënën në mbrëmje Senati do të votojë për miratimin e Scott Bessent për postin e sekretarit të Thesarit.
Noem, një aleate e presidentit Trump mori 7 vota nga demokratët.
Republikanët, të cilët gjithsesi i kishin votat e nevojshme për ta miratuar kandidaturën e saj, shprehën besimin në vendosmërinë e saj për të udhëhequr çështjet që lidhen me sigurinë kufitare dhe imigracionin.
Në një postim në rrjetet sociale, Noem falënderoi presidentin Trump për “besimin që i dha për të shërbyer si sekretare e Sigurisë Kombëtare”.
“Do të punoj për ta bërë Amerikën sërish të sigurt!” – shkroi aj.
Udhëheqësi i shumicës në Senat, republikani John Thune, tha të premten se “rivendosja e respektit për sundimin e ligjit është një nga prioritetet kryesore të presidentit Trump dhe republikanëve. Dhe kjo do të kërkojë udhëheqës të vendosur e të përkushtuar në Departamentin e Sigurisë Kombëtare”./VoA