Kryetari i Komisionit për Punë të Jashtme në senatin amerikan, Bob Menendez, ka takuar presidenten e Kosovës, Vjosa Osmani në Washington.
Pas takimit me Osmanin, Menendez ka njoftuar se me të kanë biseduar në lidhje me ndikimin rus në Ballkanin Perëndimor.
Gjithashtu, Menendez ka falënderuar shtetin e Kosovës për strehimin e refugjatëve afganë dhe ukrainas.
Senatori amerikan ka thënë se partneriteti SHBA-Kosovë është më i fortë se kurrë.
“Kënaqësi të pres presidenten e Kosovës, Vjosa Osmani, për një bisedë të rëndësishme mbi luftën kundër ndikimit rus në Ballkanin Perëndimor. Gëzohem që kam mundësinë ta falënderoj për qasjen me zemër të hapur të Kosovës në pritjen e refugjatëve afganë dhe ukrainas. Partneriteti SHBA-Kosovë është i fortë si kurrë më parë”, ka deklaruar senatori.
Presidentja Vjosa Osmani po qëndron në SHBA pas pjesëmarrjes në funeralin e ish-Sekretarës së shtetit, Madeleine Albright.
Ajo kishte thënë se gjatë qëndrimit në SHBA do të takohet me përfaqësues të lartë të shtetit dhe se do të jetë një vizitë e gjatë.