Senegali ka fituar njërën prej finaleve më dramatike dhe kontroverse në historinë e Kupës së Afrikës në futboll.
Të dielën në Rabat, kombëtarja senegaleze mposhti Marokun me rezultat 1:0, në një finale që u vendos pas vazhdimeve.
Golin e fitores e realizoi Pape Gueye në minutën e katërt të vazhdimit të parë, duke i siguruar Senegalit titullin kontinental.
Fundi i kohës së rregullt ishte jashtëzakonisht tensionues. Fillimisht, një gol i Senegalit u anulua në rrethana të dyshimta. Më pas, në minutat shtesë, gjyqtari akordoi një penallti të diskutueshme për Marokun.
Në shenjë revolte ndaj vendimeve të arbitrimit, lojtarët e Senegalit, me kërkesë të trajnerit, e lëshuan përkohësisht fushën e lojës. Ata u rikthyen disa minuta më vonë, pas ndërhyrjes së yllit të skuadrës, Sadio Mane.
Përgjegjësinë për ta ekzekutuar penalltinë e mori Brahim Diaz, i cili tentoi me stilin “panenka”, por gjuajtja e tij u ndal nga portieri i Senegalit.
Pas kësaj, ndeshja shkoi në vazhdime, ku Senegali arriti të shënojë golin vendimtar dhe të mbajë epërsinë deri në fund të 120 minutave.
Me këtë fitore, Senegali e ka fituar Kupën e Afrikës për herë të dytë në histori, pasi triumfoi për herë të parë në vitin 2021.