Kombëtarja e Shqipërisë ka mbërritur dje në aeroportin e Nishit, ku sonte do të përballet me Serbinë në kuadër të kualifikimeve për Kampionatin Botëror të ardhshëm. Atmosfera në prag të ndeshjes është e tensionuar, ndërsa autoritetet serbe kanë ndërmarrë masa të rrepta sigurie për të shmangur çdo incident të mundshëm.
Megjithatë, problemet kanë nisur që në momentet e para të qëndrimit të ekipit shqiptar. Gjatë stërvitjes së djeshme, në fushë mungoi flamuri i Shqipërisë, një gjest që ka ngjallur reagime dhe është parë si provokim nga pala shqiptare.
Përveç kësaj, mediat serbe raportojnë se autoritetet lokale janë të shqetësuara për një tjetër arsye: praninë e mundshme të tifozëve shqiptarë në stadium. Sipas tyre, shumë shqiptarë që posedojnë pasaporta serbe – veçanërisht nga Lugina e Preshevës, Bujanoci, Nishi dhe Leskovci – po blejnë bileta për të ndjekur ndeshjen nga tribunat.
Ky zhvillim ka ngjallur frikë tek organizatorët, të cilët i druhen mundësisë së incidenteve në tribuna, pasi çdo problem që mund të ndodhë gjatë ndeshjes do t’i faturohej palës serbe, pavarësisht prejardhjes së tifozëve.
Autoritetet në Serbi kanë paralajmëruar kontrolle shtesë dhe masa të posaçme për ruajtjen e rendit publik gjatë kësaj ndeshjeje, e cila pritet të zhvillohet nën vëzhgim të rreptë të forcave të sigurisë.