Sulmuesi i Kosovës, Vedat Muriqi, po kalon sezonin më të mirë të karrierës së tij në elitën e futbollit spanjoll. Me paraqitje mbresëlënëse dhe gola vendimtarë për RCD Mallorca, Muriqi është shndërruar në një nga emrat më të komentuar të këtij edicioni në La Liga.
32-vjeçari ka realizuar deri tani 22 gola në kampionat, duke u renditur ndër golashënuesit më të mirë të sezonit. Ai ndodhet vetëm dy gola prapa yllit francez Kylian Mbappé, i cili kryeson listën me 24 realizime.
Gjatë këtij sezoni, Muriqi ka arritur të thyejë disa rekorde historike te Mallorca, duke konfirmuar rolin e tij si lider absolut i skuadrës spanjolle. Paraqitjet e tij të qëndrueshme dhe ndikimi i madh në lojë kanë bërë që ai të fitojë vlerësime të shumta nga mediat sportive në Spanjë.
Forma e jashtëzakonshme e sulmuesit kosovar u shpërblye edhe me një tjetër vlerësim të madh. Të mërkurën, Muriqi u përfshi në ekipin më të mirë të sezonit në La Liga, ku bëjnë pjesë edhe superylli i Real Madrid CF, Kylian Mbappé, si dhe talenti i madh i FC Barcelona, Lamine Yamal.
Ky vlerësim konsiderohet një tjetër dëshmi e sezonit fantastik që po zhvillon “Pirati”, i cili vazhdon të shkruajë histori në futbollin spanjoll dhe të krenojë tifozët kosovarë me paraqitjet e tij.