Agim Shahini nga Aleanca Kosovare e Biznesit, përmes një reagimi në Facebook, ka thënë se Qeveria e Malit të Zi ka marrë masa ndaj rritjes së çmimeve të derivateve, duke e hequr akcizën.
Sipas tij, me këtë veprim Mali i Zi do të tërheqë edhe më shumë turistë si pasojë e çmimit më të favorshëm të derivateve.
“Për t’iu dalë në mbështetje qytetarëve të Malit të zi, qeveria e saj heq akcizën në derivate dhe çmimi i eurodizelit kushton 1.58€ për litër. Me këtë veprim arrin dy efekti për rimëkëmbjen ekonomike, duke bërë atraktive edhe më shumë për turizëm dhe duke rritur të hyra kesh nga turistët e Kosovës dhe të Shqipërisë. Kosovarët vinë në Mal të Zi, pushojnë dhe furnizohen më derivate duke i kursye deri në 0.20-0.30cent për litër”, ka shkruar Shahini në Facebook.
Në fund, Shahini ka kërkuar nga Qeveria e Kosovës të marrë veprime urgjente për ta hequr akcizën për derivate.
Ndryshe, çmimi i naftës në Kosovë sillet rreth 1 euro e 82 cent për litër, krahasuar me javët e kaluara dallimi është 11 cent më shtrenjtë.
Ndaj kësaj situate, Ministria e Tregtisë dhe Industrisë, pritet t’i përgjigjet me një vendim për caktimin e marzhës së fitimit, ku për shitësit me pakicë, fitimi në litër do të jetë 6 deri në 10, ndërsa të atyre me shumicë, 2 deri në 3 cent.
Kryetari i Soqatës së Naftëtarëve, Fadil Berjani, një propozim të tillë e kishte vlerësuar si të papranueshëm.
Ai kishte kërkuar nga Qeveria e Kosovës të ulet akciza apo edhe Tatimi mbi Vlerën e Shtuar (TVSH).