Deputeti i Partisë Demokratike të Kosovës (PDK), Ferat Shala, ka kërkuar nga Qeveria e Kosovës që të reflektojë në lidhje me përcaktimin e vlerës së koeficientit, duke propozuar që kjo vlerë të jetë të paktën 120 euro.
Shala e ka kritikuar Qeverinë e Kosovës edhe për rritjen e faturave të tatimit në pronë, duke i quajtur këto si “skandale të fundit”.
“Në kohën e inflacionit të lartë, krizës energjetike, kur ende nuk kemi ligj për pagën minimale, heshturazi Ministria e Financave nxjerr këto dy skandale, për tatimin në pronë dhe vlerën e koeficientit”, ka thënë Shala.
Sipas tij, caktimi i koeficientit është jomeritor për qytetarët e vendit, pasi, siç është shprehur ai, nuk e zgjedh problemin e atyre që nuk janë përfitues.
“Ky skandal stimulon ikjen e rinisë, na lenë të hapur rrugën e ndjekjeve ligjore. Kërkojmë nga Qeveria të reflektojë për skandalet e fundit”.
Ai ka thënë se pas zhurmave dhe pritjeve të gjata nga Qeveria, është e pakuptueshme dhe paarsyeshme si u kalkulua kjo vlerë e koeficientit.
“Koeficientin e pagës së 105 euro, pas një zhurme dhe pritjeje të gjatë nga Qeveria, është e pakuptueshme dhe e paarsyeshme si e kalkuloi këtë. E paarsyeshme është ajo që i bëhet sektorit të sigurisë, shërbyesve civilë”, ka vijuar ai.