Shtetet e Bashkuara dhe Irani kanë njoftuar arritjen e një marrëveshjeje kornizë për paqe, e cila pritet të nënshkruhet të premten në Zvicër.
Presidenti amerikan, Donald Trump, deklaroi se pas nënshkrimit të marrëveshjes “nafta do të rrjedhë sërish”, ndërsa çmimet e naftës kanë shënuar rënie pas njoftimit për marrëveshjen.
Zëvendësministri i Jashtëm i Iranit konfirmoi në televizionin shtetëror se marrëveshja është finalizuar, ndërsa udhëheqja ushtarake iraniane e ka paraqitur atë si një fitore për Teheranin.
Kryeministri i Pakistanit ishte i pari që njoftoi për marrëveshjen, duke thënë se ajo do t’i japë fund operacioneve ushtarake në të gjitha frontet, përfshirë edhe Libanin.
Më pas, marrëveshja u konfirmua edhe nga Trump dhe nga autoritetet iraniane, të cilat njoftuan se dokumenti do të nënshkruhet në Zvicër të premten.
Liderët e Britanisë së Madhe, Francës, Gjermanisë dhe Italisë e mirëpritën njoftimin për arritjen e marrëveshjes, raporton BBC.
Megjithëse detajet e plota nuk janë bërë publike zyrtarisht, mediat shtetërore iraniane raportojnë se marrëveshja përfshin lehtësimin e disa sanksioneve amerikane ndaj Iranit, zotimin e Teheranit për të mos prodhuar armë bërthamore, si dhe një armëpushim të përhershëm në të gjitha frontet, përfshirë Libanin.
Po ashtu, zëvendësministri i Jashtëm iranian bëri të ditur se negociatat për një marrëveshje përfundimtare do të vazhdojnë gjatë një periudhe 60-ditore.