Shtetet e Bashkuara të Amerikës dhe Irani u gjendën sërish në një situatë lufte të mërkurën, pas shkëmbimit më të madh të zjarrit në javët e fundit.
Uashingtoni kërcënoi me sulme edhe më shkatërruese, ndërsa Irani protestoi për një sulm që, sipas tij, vrau pesë persona dhe plagosi dhjetëra civilë në një dasmë.
Komanda Qendrore e SHBA-së (CENTCOM) tha se të martën kishte goditur sistemet iraniane të mbrojtjes ajrore, radarët, asetet detare, kapacitetet për vendosjen e minave dhe objektet e komunikimit, shkruan Reuters, transmeton Dukagjini.
Mediat iraniane raportuan se disa objektiva pranë Ngushticës së Hormuzit ishin goditur. Kjo është rruga e ngushtë detare përmes së cilës kalon një pjesë e rëndësishme e transportit të naftës dhe ku Teherani ka kërcënuar cisternat që tentojnë të kalojnë pa autorizim.
Irani tha se kishte goditur asetet amerikane në Jordani dhe Irak, sipas deklaratave zyrtare. Mediat iraniane raportuan gjithashtu për sulme në Bahrein.
Edhe pse Garda Revolucionare Islamike e Iranit (IRGC) pretendoi se kishte vrarë një numër të madh trupash amerikane në Jordani, dy zyrtarë amerikanë i thanë Reuters se, sipas vlerësimeve fillestare, nuk kishte pasur viktima amerikane.
Forcat e Armatosura të Jordanisë thanë se sistemet e tyre të mbrojtjes ajrore u përballën me 13 raketa balistike që hynë në hapësirën ajrore të vendit. Dhjetë prej tyre u interceptuan, ndërsa tre ranë në zona të largëta.
Bahreini deklaroi se dronët iranianë u interceptuan dhe u shkatërruan.
IRGC-ja tha gjithashtu se forcat e saj tokësore kryen sulme të koordinuara me raketa dhe dronë ndaj bazave amerikane në Erbil, në veri të Irakut, duke pretenduar se kishte vrarë disa personel amerikanë. As Iraku dhe as SHBA-ja nuk e kishin konfirmuar sulmin.