SHBA-ja i kërkon Rusisë ta trajtojë mirë ish-punëtorin e Ambasadës amerikane

Departamenti amerikan i Shtetit ka paralajmëruar Rusinë që të respektojë traktatet ndërkombëtare në rastin e ish-punëtorit të Konsullatës amerikane në Rusi, i cili është arrestuar.

DASH-i tha se arrestimi i tij vë në pah veprimet “gjithnjë e më agresive” që po i ndërmerr Kremlini ndaj qytetarëve të tij.

Robert Shonov, shtetas rus që ka punuar në Konsullatën tani të mbyllur, amerikane në Vlladivostok, për më shumë se 25 vjet, gjendet në burgun Lefortovo të Moskës nën akuza për bashkëpunim të fshehur me të huajt. Nëse gjendet fajtor, ai mund të dënohet deri me tetë vjet burgim.

Një video e tij, ku gjoja ai pranon fajin, u publikua më 28 gusht nga mediat lokale. Po ashtu, u publikuan edhe fotografi të thirrjeve që Shërbimi Federal i Sigurisë (FSB) i Rusisë u ka dërguar dy diplomatëve që punojnë në Ambasadën amerikane në Moskë lidhur me këtë rast.

Zëdhënësi i DASH-it, Matthew Miller, tha përmes një deklarate se akuzat e pretenduara kundër Shonovit “janë krejtësisht të pabaza”, pasi ai ishte punësuar në prill të vitit 2021 nga një kompani që ishte kontraktuar për të ofruar shërbime për Ambasadën amerikane në Moskë “në pajtim me rregullat dhe ligjet e Rusisë”.

“Shënjestrimi që po i bën Rusia zotit Shonov në bazë të statutit ‘të bashkëpunimit konfidencial’ vetëm vë në pah veprimet gjithnjë e më represive që Qeveria ruse po ndërmerr ndaj shtetasve të saj”, tha Miller.

“Ne protestojmë fuqishëm kundër përpjekjeve të shërbimeve ruse të sigurisë – që po mbështeten nga media të kontrolluara nga shteti rus – për të frikësuar punëtorët tanë. Rusia është e detyruar sipas Konventës së Vjenës për Marrëdhënie Diplomatike që t’i trajtojë diplomatët me respektin e duhur dhe të ndërmarrë të gjitha hapat e duhur për të parandaluar çdo sulm ndaj tyre, ndaj lirisë apo dinjitetit të tyre dhe ne presim që ata të përmbushin këtë detyrim”.

Raportet midis Moskës dhe Uashingtonit janë në pikën e tyre më të ulët që nga përfundimi i Luftës së Ftohtë për shkak të pushtimit rus të Ukrainës, që ka nxitur valë të reja të sanksioneve kundër Rusisë dhe shumicës së udhëheqjes së saj.

Shonov gjendet në të njëjtin burg ku gjendet edhe Evan Gershkovich, gazetari amerikan i “The Wall Street Journal”. Gershkovich është në burg që nga arrestimi i tij më 29 mars nën akuza për spiunazh. Gazetari, media ku ai punon dhe Qeveria amerikane kanë hedhur poshtë akuzat.

Shtetet e Bashkuara kanë thënë se Gershkovich është burgosur padrejtësisht dhe kanë kërkuar lirimin e tij të menjëhershëm.

Që kur Rusia nisi pushtimin në shkallë të plotë të Ukrainës në shkurtin e vitit 2022, presidenti rus, Vladimir Putin, ka zgjeruar shkallën e shtypjes ndaj personave që kritikojnë politikat e Qeverisë ruse./REL

Shija e redaktorit

Sulmuesi i përfaqësueses së Kosovës Muhamet Hyseni zyrtarizohet tek AC...

Të verdhit e rrezikshëm siç njihen në futbollin danez “AC Horsens” kanë arritur të bëjnë goditje të rëndësishme për afatin e ri kalimtar të...

Fermeri 74 vjeçar i shtëpisë së të moshuarve e funksionalizon...

Domate, speca, tranguj, kunguj e plot lloje të tjera perimesh janë të gjeturat e stinës në këtë serrë, mu në zemër të kryeqytetit. Ajo gjendet...

Shefja e katalunasve në Parlamentin e Spanjës: S’do të ndalemi...

Partia katalunase “Junts per Catalunya” kanë marrë një iniciativë në Parlamentin e Spanjës për t’i kërkuar Qeverisë së Spanjës njohjen e pavarësisë së Kosovës...

Të fundit nga rubrika