Një lider i lartë i Shtetit Islamik është vrarë gjatë një operacioni të përbashkët mes forcave të Nigerisë dhe Shteteve të Bashkuara të Amerikës.
Presidenti i Nigerisë, Bola Tinubu, konfirmoi lajmin përmes një deklarate, duke theksuar se forcat nigeriane, në bashkëpunim me ushtrinë amerikane, realizuan një operacion të suksesshëm kundër ISIS-it, shkruan BBC, transmeton Dukagjini.
Operacioni u bë publik fillimisht nga presidenti amerikan, Donald Trump, i cili e përshkroi Abu-Bilal al-Minukin si “numrin dy të ISIS-it në nivel global”.
Al-Minuki ishte shpallur terrorist global nga Uashingtoni në vitin 2023. Në një postim në Truth Social, Trump deklaroi se misioni i përbashkët në Afrikë ishte “ekzekutuar në mënyrë perfekte” për të eliminuar “terroristin më aktiv në botë”.
Sipas autoriteteve nigeriane, Al-Minuki u vra së bashku me disa nga bashkëpunëtorët e tij gjatë një sulmi në kompleksin e tij në rajonin e Liqenit Çad.
Ushtria e Nigerisë tha se operacioni preciz u mundësua falë partneritetit të fundit mes SHBA-së dhe Nigerisë, si dhe shkëmbimit të inteligjencës.
Zyrtarët ushtarakë deklaruan se ai ishte promovuar në pozitën “Shef i Drejtorisë së Përgjithshme të Shteteve”, duke e bërë një nga figurat më të larta në hierarkinë globale të IS-it. Më herët, ai kishte mbikëqyrur operacionet e lidhura me IS-in në rajonin e Sahelit dhe Afrikën Perëndimore, përfshirë sulme ndaj civilëve dhe komuniteteve minoritare.
Al-Minuki lidhej gjithashtu me rrëmbimin e nxënëseve në Dapchi në vitin 2018, kur më shumë se 100 vajza u morën peng nga grupi militant Boko Haram në verilindje të Nigerisë. Para se t’i betohej besnikëri IS-it në vitin 2015, ai konsiderohej një komandant i lartë i Boko Haram-it.
Trump e cilësoi vdekjen e tij si një goditje të rëndë për rrjetet afrikane dhe globale të IS-it, duke theksuar se kjo do të ndikojë në financimin dhe strukturat komanduese të organizatës terroriste.