Ushtria amerikane ka bërë të ditur se ka kryer sulme “të rënda” kundër Iranit të mërkurën, në shenjë hakmarrjeje për tentativat e Iranit për sulme me raketa balistike ndaj forcave amerikane.
Komanda e SHBA-së (Centcom) njoftoi se goditi “dhjetëra” objektiva të Gardës Revolucionare Islamike (IRGC) si përgjigje ndaj lëshimit të raketave nga Irani të martën drejt bazave amerikane në Jordani dhe ndaj anijeve në Ngushticën e Hormuzit, shkruan BBC, transmeton Dukagjini.
Përshkallëzimi i fundit erdhi një ditë pasi konflikti u zgjerua, me sulmet e para të shpallura publikisht të përbashkëta SHBA–Arabia Saudite kundër grupeve të mbështetura nga Irani në Irak.
Kur SHBA-ja dhe Izraeli nisën sulme ushtarake kundër Iranit në shkurt, presidenti Donald Trump kishte deklaruar se lufta do të zgjaste vetëm disa javë, por ajo tashmë ka vazhduar për pesë muaj pa asnjë shenjë përfundimi.
Të mërkurën, Axios raportoi, duke cituar një zyrtar amerikan të paidentifikuar, se Trump ishte takuar me ministrin saudit të Mbrojtjes, princin Khalid bin Salman, i cili kishte përcjellë se Arabia Saudite dëshiron uljen e tensioneve. BBC ka kontaktuar Shtëpinë e Bardhë për koment.
Konflikti është riaktivizuar pas disa ditësh qetësie relative.
Për disa ditë, të dyja palët kishin ndalur sulmet, ndërsa dukej se kishin rifilluar bisedimet me shpresën për një zgjidhje diplomatike. Trump i quajti ato “negociata shumë miqësore”, megjithëse Teherani mohoi se po zhvilloheshin bisedime.
Sulmet amerikane nisën në orën 20:00 sipas kohës lindore amerikane (01:00 të së enjtes sipas BST) dhe zgjatën rreth një orë. Centcom i cilësoi ato si “një përgjigje të fuqishme ndaj tentativave iraniane të djeshme për të sulmuar forcat amerikane të vendosura në Lindjen e Mesme”. Sipas Centcom, të gjitha raketat iraniane u interceptuan.
SHBA-ja tha se kishte goditur “qendra komanduese ushtarake, objekte raketore dhe dronësh, pozicione të mbikëqyrjes dhe mbrojtjes bregdetare, si dhe kapacitete detare”.
Disa orë para sulmeve, Trump premtoi hakmarrje ndaj Iranit për tentativën e sulmit ndaj trupave amerikane një ditë më parë.
“Do t’i godasim shumë fort, sepse tani është radha jonë të godasim. Ata e dinë se po vjen. Na kërkuan të mos e bëjmë”, tha Trump.
IRGC deklaroi se kishte shënjestruar një bazë ajrore amerikane dhe një qendër komanduese në Jordani “në përgjigje të akteve të agresionit të ushtrisë amerikane që vret fëmijë”.
Ajo shtoi gjithashtu se forcat detare kishin goditur tre cisterna nafte në Ngushticën e Hormuzit, pasi ato “kishin injoruar paralajmërimet” dhe kishin lundruar përgjatë asaj që e quajti një rrugë “të pasigurt dhe të paligjshme” në këtë korridor jetik të Gjirit.
Të premten e kaluar, Trump kishte pezulluar një fushatë intensive bombardimesh që kishte zgjatur 13 net radhazi. SHBA-ja tha se kishte shënjestruar armë dhe objekte ushtarake iraniane, ndërsa raportohet se dhjetëra persona humbën jetën.
Të martën, Centcom njoftoi se sulmet e përbashkëta SHBA–Arabia Saudite kishin goditur “disa baza logjistike dhe të armëve terroriste në Irakun lindor”, si përgjigje ndaj më shumë se 30 sulmeve me dronë të drejtuar nga IRGC gjatë 72 orëve të fundit.
Forcat paraushtarake irakiane të Mobilizimit Popullor (PMF), të dominuara nga milicitë shiite të mbështetura nga Irani, thanë se të paktën 20 anëtarë të tyre ishin vrarë nga sulmet amerikano-saudite.
Presidenca e Irakut dënoi bombardimin e bazave të PMF-së, duke e quajtur atë “një sulm të papranueshëm dhe një shkelje flagrante të sovranitetit të Irakut”.
Megjithatë, Trump deklaroi për Fox News se sulmet ishin “koordinuar me qeverinë irakiane”.
Arabia Saudite, që e sheh veten si fuqinë kryesore sunite në rajon, dhe Irani, vendi më i madh shiit, kanë qenë prej dekadash në një garë për dominim rajonal.