Shtetet e Bashkuara të Amerikës kanë njoftuar për më shumë se 500 sanksione të reja kundër Rusisë për luftën në Ukrainë dhe vdekjen në paraburgim të liderit të opozitës ruse, Alexei Navalny.
“Sanksionet synojnë njerëz të lidhur me burgosjen e Navalny dhe makinën luftarake të Rusisë”, ka thënë presidenti Joe Biden.
Kufizimet e eksportit do të vendosen për rreth 100 firma ose individë.
BE-ja ka njoftuar gjithashtu sanksione, të cilave Moska iu përgjigj duke i ndaluar zyrtarët e BE-së të hynin në Rusi.
Është e paqartë se çfarë ndikimi do të kenë sanksionet në ekonominë e Rusisë.
Në një deklaratë, presidenti Biden tha se sanksionet “do të sigurojnë” që presidenti rus, Vladimir Putin, “të paguajë një çmim edhe më të lartë për agresionin e tij jashtë vendit dhe shtypjen në vend”.
Sanksionet shënojnë një javë qëkur Navalny vdiq papritur në një burg të Rrethit Arktik.
Biden ka thënë se nuk mund të ketë “asnjë dyshim” se presidenti rus ishte fajtor, raporton BBC.
Sanksionet vijnë gjithashtu në prag të përvjetorit të dytë të pushtimit të plotë të Ukrainës nga Rusia.
“Dy vjet më parë, ai u përpoq të fshinte Ukrainën nga harta. Nëse Putini nuk paguan çmimin për vdekjen dhe shkatërrimin e tij, ai do të vazhdojë,” ka deklaruar Biden.
Të premten, BE-ja ka njoftuar gjithashtu grupin e saj të sanksioneve ndaj afro 200 kompanive dhe njerëzve të akuzuar për ndihmën e Rusisë për të blerë armë, ose për përfshirje në rrëmbimin e fëmijëve ukrainas, diçka që Moska e mohon.
Ato përfshinin 10 kompani ruse dhe individë të përfshirë në dërgimin e armatimeve të Koresë së Veriut në Rusi, përfshirë ministrin e Mbrojtjes të Koresë së Veriut.
BE-ja tani ka listuar më shumë se 2000 individë që nga fillimi i luftës.
Në përgjigje, Ministria e Jashtme e Rusisë tha se kishte zgjeruar ndjeshëm listën e zyrtarëve dhe politikanëve të BE-së, të cilëve u ndalohej hyrja në Rusi.
“Bashkimi Evropian po vazhdon përpjekjet e tij të pafrytshme për të ushtruar presion mbi Rusinë përmes masave kufizuese të njëanshme”, thuhet në një deklaratë.